يقولون معك مشاركة ياولد قلـت أيـه
يقول السبيعي في مزاين بنـي عمـه
هلا مرحبـا ترحيـبٍ اقدمـه واهديـه
لبو فيصل اللي كايد الحمـل مـا همـه
بحضرة سموه نرفع الصوت و نحييـه
بترحيب شامل يرضي الجمـع ويعمًـه
حضوره لنا تشريف والجود من راعيه
ما نستغربه من راعي العـزم والهمـه
سمو الأمير اللي عسى البدو ماتبكيـه
شملهم بعطف وظمهم والفخـر ضمـه
طويل الذراع اللي هل البل تذرى بيـه
ويضفي على زلاتهـم بشتـه وكمـه
جميع القبائـل وابلهـا كلهـا تعنيـه
وبقولبهـم وانظارهـم تلتفـت يـمـه
نزف لسموه شكر واعجاب ما نخفيـه
ونعلـن ولأنـا للملـك قائـد الأمــة
يعيش أبو متعب والقوافي على طاريـه
تجي واردة ورد الضوامى على الجمـه
حبيب المواطن والوطـن كلنـا نغليـه
كلامٍ من أقصاء القلب في ذمتـي ذمـة
ملكنا عسى رب الخلايـق لنـا يبقيـه
يقـود المسيّـره والحواسيـد منطمـة
تحت رايته نمشـي وبرواحنـا نفديـه
ونلبس بدل واسلافنـا تلبـس العمـة
عهدنا ماهوب اليـوم لملوكنـا نعطيـه
لنا بصمةٍ في بيـرق النصـر ومهمّـه
سبيع الفخر والعز من تنصـره تعليـه
تعز الصديق وتقهر الخصـم وتسمـه
كلامٍ نقولـه فـوق الأشهـاد ونغنيـه
وشمس الحقيقه نورها يجلـي الغمـه
نقشنا على صم الصخر خط يا قاريـه
تمعن وتلقى الكيف يغلب علـى كمـه
على العز والتقـوى وتاريخنـا نبنيـه
كما بني برجاً شامخـاً عالـي القمـه
نواصل مسيرة حاضر المجد مع ماضيه
وحفل المزاين يجمـع الشمـل ويلمـه
بجوٍ عليـلٍ ينعـش الـروح ويداويـه
مداهيل وضحٍ تسرق الشوف وتخمـه
عليها جمـالٍ يذهلـك والفحـل تتليـه
خطاة أشقحٍ تزبد لهاتـه علـى فمـه
ليا مر من جنبك تقـول انّـك تناجيـه
تقيصّر وعصّب كن في خاطـره زمـه
يلاحظك بآخر عيّنـه اللـي تواليكيـه
يشوفك و وجهه ما تغير عـن اليمـه
مقيمه مهيب ملفقـه والجمـل قانيـه
بناته حقايق والضرايب خـوات أمـه
وصفرٍ وحمّر ومجّهمٍ ما لهـا تشبيـه
يقع قطعةٍ من ليـل وإلإ طـرف حمّـه
لها مهدلٍ نـازل ونيـاً تقاعـس فيـه
جثيلـة فقـار وهزعـةٍ غيـر ملتمـه
وشعلٍ تشادي لون بـنٍ كثيـر مويـه
يزله غشيمٍ وباقـي الفـوح مـا تمـه
ومن قال حب البل تخلـف ولا نبغيـه
نقول لقليل العرف يخشى علـى دمـه
عطايا جليل الملك ما تقبـل التشويـه
ورد ذكرها في صدر الآيـات يالرمـه
لها حب راسـخ لا نبيعـه ولا نعطيـه
موارث جدود فيهـا الاجيـال مهتمّـه
عليها نغار ليا حصل في الوجيه وجيـه
ولا نستمع في ناقـل الهـرج والنمـه
على وصفها نشعر بنوعٍ من الترفيـه
ومن يستطيـع يميـز العلـم ويظمّـه
يصب الهدف في نصف كبده ولا يخطيه
على وزنته لا هـس دونـه ولا زمـه
وفالختم صلو حسب الأرشاد والتوجيـه
على من بعـث خاتـم نبييـن وآيمّـه
قصيدة سمعتها واعجبتني
